ӨМНӨГОВЬ АЙМАГ “ПУСАН ХОТЫН ГЛОБАЛ ХОТУУДЫН АЯЛАЛ ЖУУЛЧЛАЛЫГ ДЭМЖИХ АГЕНТЛАГ (TPO)”-ИЙН ГИШҮҮН ОРОН БОЛЖ, АЯЛАЛ ЖУУЛЧЛАЛАА 21 УЛСАД СУРТАЛЧИЛЖ ЭХЭЛНЭ

Монгол Улсаас БНСУ-ын Пусан хотод суугаа Консул Ц.Жадамбаа, Пусан хотын Глобал хотуудын аялал жуулчлалыг дэмжих агентлаг (TPO)-ийн Ерөнхий Нарийн Бичгийн дарга Канг Да Ын, Өмнөговь аймгийн Засаг дарга Н.Энхбат тэргүүтэй төлөөлөгчидтэй тус агентлагийн байранд уулзалт хийв.

Уулзалтад TPO-гийн Олон улсын харилцааны хэлтсийн дарга Жу Жэ Дун, мэргэжилтэн Жү Жи Ын, Өмнөговь аймгийн Даланзадгад сумын Засаг дарга Ц.Дэнээдорж, Сэврэй сумын Засаг дарга Б.Батсайхан нар оролцов.

Уулзалтын үеэр TPO байгууллага үйл ажиллагаа, зорилгоо танилцуулсан бөгөөд Өмнөговь аймгийн зүгээс тус олон улсын байгууллагад гишүүнээр элсэхээр боллоо.

Ингэснээр гишүүн 21 улсад Өмнөговь аймгийн аялал жуулчлалын салбарыг сурталчлахын зэрэгцээ удирдлагын чадавх, хүний нөөц бэлтгэх зэрэг олон талын хамтын ажиллагааны боломжууд нэмэгдэх юм.

Мөн 2025 оны 10 дугаар сарын 27–29-нд Пусан хотноо зохион байгуулагдах “Дэлхийн хотуудын аялал жуулчлалын анхдугаар дээд хэмжээний уулзалт”-д Өмнөговь аймаг урилгаар оролцож, “Монголын говиор аялцгаая” танилцуулгыг хийхээр боллоо.