МОНГОЛ УЛСЫН АЯЛАЛ ЖУУЛЧЛАЛЫН САЛБАРТ ХӨРӨНГӨ ОРУУЛАЛТ ХИЙХ ТАЛУУДЫН УУЛЗАЛТ ПУСАН ХОТОД ЗОХИОН БАЙГУУЛАГДАНА. 

 Монгол Улсаас БНСУ-ын Пусан хотод суугаа Консул Ц.Жадамбаа БНСУ-ын Глобал хотуудын аялал жуулчлалыг дэмжих байгууллага (Tourism Promotion Organization for Global Cities, TPO)-ын Ерөнхий Нарийн Бичгийн Дарга Канг Да Ын-г хүлээн авч уулзлаа.

 Тэрээр TPO-н ЕНБДарга Канг Да Ынд хандан ирэх 2025 оны 10 дугаар сарын 27-29 ний өдрүүдэд Пусан хотод зохион байгуулагдах “Дэлхийн Хотуудын Аялал Жуулчлалын анхдугаар дээд хэмжээний уулзалт”-ын үеэр Монгол Улсын аялал жуулчлалын салбарын аж ахуйн нэгж, байгууллагуудыг сурталчлан таниулах зорилгоор Аялал жуулчлалын салбарын Хөрөнгө оруулалтын уулзалтыг хөтөлбөрт нэмэлтээр тусган зохион байгуулах санал дэвшүүлэв.

 TPO-н ЕНБДарга Канг Да Ын-ий зүгээс Консул Ц.Жадамбаагийн гаргасан дээрх санаачилга нь тус арга хэмжээний зорилго болон агуулгатай бүрэн нийцэж байгааг онцлоод, уг ажлыг бүх талаар дэмжих боломжтойгоо илэрхийлэв. Үүний дагуу талууд харилцан тохиролцож 2025.10.28-нд Монгол Улсын аялал жуулчлалын салбарт хөрөнгө оруулалт хийх сонирхолтой талуудыг оролцуулсан уулзалт, танилцуулгыг зохион байгуулахаар тохиролцов.

TPO нь 2002 онд байгуулагдсан олон улсын байгууллага бөгөөд өдгөө 17 улсын 131 хотыг гишүүнчлэлдээ нэгтгэн үйл ажиллагаа явуулж байна. Байгууллагын үндсэн зорилго нь гишүүн хотуудын аялал жуулчлалыг дэмжих, сурталчлах, туршлага солилцох, хамтын ажиллагааг өргөжүүлэхэд чиглэдэг юм. Монгол Улсаас одоогоор Улаанбаатар хот, Дорноговь болон Увс аймгууд тус байгууллагад гишүүнээр элсээд байгаа бөгөөд цаашид бусад аймаг, хотыг гишүүнчлэлд элсүүлэх ажлыг Пусан дахь Консулын газраас дэмжиж ажиллах хүсэлтийг төлөөлөгч уулзалтын үеэр илэрхийллээ.