ҮЛЬСАНЫ “ЭВ НЭГДЭЛ” ХОЛБООТОЙ МОНГОЛ СОЁЛОО СУРТАЛЧИЛАХ, ИРГЭДИЙН ЗӨРЧИГДСӨН ЭРХИЙГ ХАМГААЛАХ ЧИГЛЭЛД ХАМТРАН АЖИЛЛАНА.
Консул Ц.Жадамбаа Үльсан хотын Монгол иргэдийн "Эв нэгдэл" холбооны тэргүүн Түвшинжаргал болон холбогдох төлөөллийг хүлээн авч уулзаж олон чухал асуудлуудыг хэлэлцлээ.
"Эв нэгдэл" холбоо нь 2019 оноос үйл ажиллагаагаа явуулж эхэлсэн бөгөөд Үльсан хотод оршин суугаа Монгол иргэдийн дунд Үндэсний баяр наадам болон соёлын арга хэмжээг тогтмол зохион байгуулдаг.
Уулзалтаар хоёр улсын хооронд дипломат харилцаа тогтоосны 35 жилийн ойн хүрээнд БНСУ-ын Өмнөд бүсийн нэгдсэн Даншиг наадмыг хамтран өргөн хүрээнд зохион байгуулах асуудлыг хэлэлцэж, Монгол иргэдийн дунд Солонгос хэлний анхан шатны танхимын хичээлийг зохион байгуулах талаар санал солилцов.
Мөн иргэний эрх зүйн асуудлаар мэдээлэл хүргэх, эрх нь зөрчигдөж буй иргэд болон эмэгтэйчүүдийн эрхийг хамгаалах нөхцөл байдлын судалгааны ажилд хамтран ажиллах, тус бүс нутагт оршин суугаа Монгол хүүхдүүдийн Монгол хэлний боловсрол, эрүүл мэндийн үйлчилгээг түргэн шуурхай авах талаар холбогдох байгууллагатай хамтран ажиллах болон хүсэлт хүргүүлэх талаар харилцан мэдээлэл солилцов.