КОНСУЛЫН ТОЙРОГ ДАХЬ БИЗНЕС ЭРХЛЭГЧДИЙН ХАРИЛЦААГ ШИНЭ ТҮВШИНД ГАРГАНА.

Монгол Улсаас БНСУ-ын Пусан хотод суугаа Консул Цагаан-Өвгөний Жадамбаа Солонгос Монголын хамтын ажиллагааг дэмжих холбооны Дэд дарга И Сан Хуг 2025 оны 3 дугаар сарын 14-ны өдрийн 10 цагт хүлээн авч уулзав.

Дэд дарга И Сан Ху нь 2010 оноос эхлэн Улаанбаатар хот, Сүхбаатар, Дорнод, Сэлэнгэ, Баянхонгор, Хөвсгөл зэрэг аймаг, сумдуудад болон Монголын Хараагүйчүүдийн Үндэсний Холбоо, Нийслэлийн 116 дугаар тусгай сургууль зэрэг байгууллагуудтай хамтран харааны бэрхшээлтэй иргэдэд хараа зүйн оношилгоог хийх, харааны шил тааруулах ажлыг үнэ төлбөргүй зохион байгуулан, нийт 21,000 гаруй Монгол иргэдэд эрүүл мэндийн сайн үйлсийн ажлыг хэрэгжүүлсэн байна.

Консул Ц.Жадамбаа хөгжлийн бэрхшээлтэй иргэдэд тусалж буй сайн үйлсийн ажилд нь Монгол иргэдийнхээ өмнөөс талархал илэрхийлэн, цаашид хоёр улсын бизнес, эдийн засгийн хамтын ажиллагааг өргөжүүлэх чиглэлээр хамтран ажилахаар санал солилцов.